പാഴ്മരുഭൂവില്‍ ദാഹനീരിനായ് യാചിക്കയോ
വറ്റിയോരുരവകളോര്‍ത്തുകേണീടുന്നതോ,
നിശ്ചയമില്ല,യെന്റെ മാനസം കവിതേ നിന്‍
വേര്‍പാടിലുരുകുന്നതൊന്നുഞാനറിയുന്നൂ.
നീയെന്റെ സര്‍വസ്വവുമായിരുന്നനാള്‍ ജീവത്-
ഗന്ധമായുയര്‍ന്നെന്നെയുയയര്‍ത്തീ,നാകത്തോളം!
നിന്നിലായലിഞ്ഞെത്ര രാവുക ള്‍,പകലുകള്‍
വേര്‍തിരിച്ചറിയാതെ കടന്നുപോയീമുന്നം!
അരുവിക്കരയിലെ ശീതളഛയപേറി
നര്‍മ്മസല്ലാപംപൂണ്ട നാള്‍കളു,മൌന്നത്യത്തിന്‍-
ഹിമബിന്ദുക്കള്‍ചൂടി,തീക്ഷ്ണതയറിയാതെ-
യിരുന്നോരാത് മഹത്യാമുനമ്പും,പാറക്കെട്ടും.
കോടമഞ്ഞുറയവേ,യകലാതിരിക്കുവാ-
നാശ്ലേഷബദ്ധമായ ഗിരിപാര്‍ശ്വവും,കാടും,
നീമറന്നെന്നോ,യെന്നെമറക്കാന്‍വേണ്ടി നിന്റെ
വാസഗേഹങ്ങളെല്ലാം വെടിഞ്ഞേയകന്നോ നീ?
നീയില്ലാമനസ്സിന്റെ യൂഷരത്വവുംപേറി-
യെങ്ങിനെകഴിയുവാന്‍?നീ പൊറുക്കില്ലയെന്നോ?
തമ്മിലേറ്റിരുന്നനാളോതിയതെല്ലം വ്യര്‍ഥ-
മെന്നതോ സത്യം,പാടേയകന്നേ കഴിഞ്ഞെന്നോ?
നോവുകളെകീയെന്നല്‍ സ്നേഹത്തിന്നുദാത്തത,
നീയെന്നെമറന്നതും,തുല്യതപേറീടുമ്പോള്‍
നിന്‍പ്രസാദത്തിന്നായി കുമ്പിളുംനീട്ടിയിന്നീ-
കമിതാവിരിക്കുന്നൂ,നീ കനിയില്ലേ വീണ്ടും?
ഇല്ലെങ്കിലീയത്നത്തിലവശേഷിക്കുംപ്രാണന്‍
പോയിടുംവരേതപംതുടരും,അന്ത്യത്തില്‍നിന്‍
ദര്‍ശനംലഭിക്കുവാന്‍ഭാഗ്യമുണ്ടായീയെങ്കില്‍
ധന്യനായീടും,മതി,മറ്റെന്തുകൊതിക്കുവാന്‍?.
5 comments:
പരമാര്‍ഥങ്ങള്‍...
മനോഹരമായിരിക്കുന്നു.....കവിത
ഈ വരികള്‍ മനോഹരം...
നിശ്ചയമില്ല,യെന്റെ മാനസം കവിതേ നിന്‍
വേര്‍പാടിലുരുകുന്നതൊന്നുഞാനറിയുന്നൂ.
നീയെന്റെ സര്‍വസ്വവുമായിരുന്നനാള്‍ ജീവത്-
ഗന്ധമായുയര്‍ന്നെന്നെയുയയര്‍ത്തീ,നാകത്തോളം!
നിന്നിലായലിഞ്ഞെത്ര രാവുക ള്‍,പകലുകള്‍
വേര്‍തിരിച്ചറിയാതെ കടന്നുപോയീമുന്നം!
നന്‍മകള്‍ നേരുന്നു
നിന്‍പ്രസാദത്തിന്നായി കുമ്പിളുംനീട്ടിയിന്നീ-
കമിതാവിരിക്കുന്നൂ,നീ കനിയില്ലേ വീണ്ടും?
മനോഹരമായിരിക്കുന്നു
വളരെ നല്ല കവിത.
നിന്നെഞാനൊരുനാളുംവെടിഞ്ഞില്ലല്ലൊസഖേ,
എന്നെനീമറന്നതാണെങ്കിലും,ക്ഷമിപ്പൂഞാന്‍.
ശീതളഛായാതലതല്പവും,നികുഞ്ജവും
നീതന്നെയുപേക്ഷിച്ചുപോയതല്ലയോദൂരേ.
പാഴ് മരുഭൂവില്‍മരുപ്പച്ചകാണുമെന്നോര്‍ത്തു
പാറിനീയകന്നകന്നകലേപ്പോയെന്നാലും
വരളുംചുണ്ടും കരള്‍ത്തടവും തപിക്കുമ്പോള്‍
വരുമിങ്ങൊരുനാളിലെന്നുഞാന്‍ വിചാരിച്ചൂ.
ഇനിയെങ്കിലുംപാതവക്കിലേപ്പാഴ് ക്കുണ്ടിലെ
കിനിയുംചളിവെള്ളമാഗ്രഹിച്ചീടായ്കനീ.
നാമൊന്നായലിയുമ്പോല്‍ ക്ഷുത് പിപാസയില്ലല്ലോ
പ്രേമത്തിന്‍ലഹരിയില്‍ മറ്റെന്തുവേണം വേറേ?
(എം.എസ്.നായര്‍,ചാമ്പാട്)
Post a Comment